香港新浪網 MySinaBlog
« 上一篇 | 下一篇 »
最美麗的第七天 | 25th Jul 2019 | 一般 | (77 Reads)

大編輯編咗兩本暢銷書「六四印記」與「六月危城」,居然成為半個出版人,不少二樓書店追call要書,令佢電話響個不停,難以招架

最大嘅書商如三聯、商務、中華當然唔會搵佢啦,
此亦證明,市場最緊要有足夠參與者,提供競爭,
否則三大書店一聲唔要、唔賣,「敏感政治書」在香港即刻完蛋,
有人話搞網購啦,以此問大編輯,
佢話知易行難,小微企如在網上賣書,淨係郵費已經殺死你,
何況還要搵工人包書、寄書?

既是初入行,於是佢有去參加一啲出版業之論壇,發覺在香港搞出版確實不易,如要削減成本,可以去深圳印刷,但內地之審查制度,密不透風,即使係印刷廠亦會審查內容,可以拒絕印刷,於是「六月危城」呢類書不能在深圳印刷,搵一啲仍未在珠三角設廠嘅印刷公司承印,例如「百樂門」。大編輯驚住終有一日,所有香港印刷公司都搬晒上大灣區,本港出版業之「一國兩制」也就完蛋了。

講番「六月危城」,「送中條例」影響甚大,當初最先反對「逃犯條例」修訂嘅,就係商界、巨企(由香港總商會,美國商會代表)及廠商(由中華廠商會聯合會,工業總會代表)皆有反對意見,故此李家超頻頻去商會見人,猛咁解畫,修改原議,但商界仍然「面和心不和」,中聯辦見勢色唔對,由王志民召集所有香港人大政協到中聯辦訓話,商界先至叫做歸邊,田北俊故此有金句:「早啲講吖」,有此背景,六月發生不斷示威衝突事件後,冇一個大亨肯公開撐林鄭。「南華早報」7月21日有報導:「Tycoons and Business Elite Washing Their Hands of Lam」,簡直係摑林鄭一巴,指本港大亨與商界精英冇人撐林鄭,最多只係撐警,林鄭至今已成為孤家寡人。

建制派撐警之餘亦痛批市民遊行,打擊旅遊零售,但睇香港旅發局上星期發表嘅旅客數字,遊行對六月份旅遊冇影響噃,6月份到港整體遊客數字係514萬人次,同比增加8.5%,其中內地客有399萬,增加10.2%。旅發局着意將數字細分:內地客由6/6至10/6增加33.1%,6月11-15跌3.6%,16-20跌2.5%,21-25反彈增加12.8%,其實打擊零售額主要問題係遊客人均消費下滑,2011年全年平均係7470元,高峰係2013年之8123元,之後逐漸下降至2018年之6607元,今年第一季更跌至6010元,內地旅客之人均消費減少可能因為(一)購買奢侈品已達飽和,(二)貿易戰影響,(三)環球經濟增長放緩,六月危城效果反而較小。至於七月以後下半年,唔講示威,都係增長緩慢嘅嘞!

左丁山